Памежны камітэт Беларусі абвясьціў пра першыя вынікі сьледзтва наконт катастрофы польскага верталёта. Паводле беларускага боку, машына ўпала на зямлю й распалася на дзьве часткі.  Нягледзячы на выцек паліва, верталёт не загарэўся.

На месцы здарэньня да гэтага часу працуе беларуска-польская сьледчая камісія. Верталёт польскай Памежнай службы разьбіўся на тэрыторыі Беларусі, 200 мэтраў ад польскай мяжы. Загінулі тры асобы.

Беларускія памежнікі абвяргаюць інфармацыю аб тым, што верталёт быў зьбіты. “Палёт польскага верталёта быў узгоднены зь беларускім бокам” – паведаміў прэс-сакратар Памежнага камітэту Беларусі Аляксандар Цішчанка.

Генэральны консул Польшчы ў Берасьці Яраслаў Ксёнжэк паведаміў нашаму радыё, што ў Беларусі ўжо знаходзяцца ўсе польскія экспэрты. Іх задача – дапамагчы беларусам у выяўленьні акалічнасьцяў і прычын катастрофы.

Яшчэ сёньня целы польскіх памежнікаў будуць дастаўленыя на радзіму.