Амэрыканскае касьмічнае агенцтва NASА паінфармавала аб адкрыцьці значнай колькасьці вады на месяцы. Гэтае адкрыцьцё зьяўляецца вынікам экспэрымэнту бамбардзіроўкі месяца, якая адбылася ў мінулым месяцы.

На пачатку кастрычніка NASА выстраліла ў кірунку месяца ракету Atlas V Center. У выніку ўдару ўзьнікла хмара пылу вышынёю 10 кілямэтраў, празь якую пазьней праляцеў касьмічны спадарожнік. Перад тым, як спадарожнік ударыў у месяц, ён пераслаў на зямлю інфармацыю, якую прааналізавалі навукоўцы NASА. Сёньня яны абвесьцілі, што ўступны аналіз засьведчыў пра існаваньне на месяцы замерзлай вады.

„Мы адкрываем таямніцу нашага найбліжэйшага суседа й цэлай сонечнай сыстэмы”, – заявіў прафэсар Мішэль Варго з цэнтру NASА ў Вашынгтоне. Навукоўцы ня ўтойваюць энтузіязму з прычыны адкрыцьця вады на месяцы. Аднак яны папярэджваюць, што поўны аналіз дадзеных зойме яшчэ крыху часу.

Хоць здаецца, што месяц цалкам сухі, то навукоўцы здаўна падазравалі, што ў яго паўднёвай частцы можа знаходзіцца вялікая колькасьць лёду. Амэрыканскае бамбардаваньне месяца пацьвердзіла гэтую гіпотэзу. Наяўнасьць вады на месяцы павялічвае шанец на збудаваньне там сталай базы, якое прадугледжвае амэрыканская касьмічная праграма.