16 лістапада – чарговы Дзень салідарнасьці з палітвязьнямі ў Беларусі й сем’ямі зьніклых беларускіх палітыкаў і актывістаў. Усіх неабыякавых людзей, якія хочуць выказаць сваю салідарнасьць, запрашаюць прыйсьці а 18 гадзіне на Кастрычніцкую плошчу Менску.

Палітычных вязьняў цяпер у Беларусі трое – гэта ваўкавыскія прадпрымальнікі Мікалай Аўтуховіч і Юры Лявонаў, а таксама актывіст „Маладога фронту” Арцём Дубскі.

Надалей не расьсьледаваныя справы зьнікненьняў Віктара Ганчара, Юрыя Захаранкі, Анатоля Красоўскага й Дзьмітрыя Завадзкага.

Лёсы зьніклых і палітвязьняў непакояць ня толькі беларусаў, але й частку эўрапейскіх палітыкаў, якія мяркуюць, што нельга цалкам лібэралізаваць адносіны зь беларускімі ўладамі без вызваленьня палітвязьняў, а таксама зрухаў у сьледзтве па справе зьнікненьняў.

Пра гэта ў прыватнасьці засьведчыў віцэ-маршалак Сэнату Польшчы Зьбігнеў Рамашэўскі падчас размовы зь лідэрам Аб’яднанай грамадзянскай партыі Анатолем Лябедзькам.

Размова з Анатолем Лябедзькам у далучаным гукавым файле.

Алена Пытэль