Пратэсты ў абарону Аляксея Навальнага прайшлі ў 140 гарадах Расіі. Расійскія незалежныя СМІ паведамляюць, што паліцыя жорстка разганяла мітынгі прыхільнікаў апазіцыйнага лідара. Усяго затрымана каля 3200 чалавек, у тым ліку больш за 1200 у Маскве.
У Санкт-Пецярбургу паліцыя затрымала амаль 500 чалавек, а ў іншых гарадах - ад некалькіх да некалькіх дзясяткаў чалавек.
Самая шматлікая дэманстрацыя прайшла ў сталіцы. У цэнтры Масквы пратэставаць выйшлі ад 15 да 20 тысяч чалавек. Людзі крычалі "Расія без Пуціна" і патрабавалі вызвалення Аляксея Навальнага.
У расійскай сталіцы адбыліся найбольш жорсткія сутыкненні паміж дэманстрантамі і паліцыянтамі. Пацярпелі некалькі дзясяткаў чалавек, у тым ліку журналісты.
У Пецярбургу супрацоўнік паліцыі ўдарыў нагой у жывот 54-гадовую Маргарыту Юдзіну падчас разгону мітынгу. Яна знаходзіцца ў шпіталі ў непрытомным стане. У яе сур'ёзная траўма галавы, за ноч ёй стала горш. Маргарыта знаходзіцца ў рэанімацыйным аддзяленні, паведаміў расійскі рэсурс Baza.
Апазіцыянеры абвясцілі, што на наступным тыдні зноў выйдуць на вуліцу.
ПР/юл