Дуэт Baisan & Yasinski выпусціў эксперыментальны альбом, дзе спалучыў баян з вершамі і песеннай структурай - розныя тэкставыя і музычныя плыні. Матэрыял быў запісаны зімой 2021 года ў Празе ў максімальна камернай манеры. Канцэпцыю візуалізаваў у крафтавай вокладцы і фотаматэрыялах Алесь Кот-Зайцаў. Паслухаць альбом можна на афіцыйнай старонцы праекту ў BandCamp, жывыя прэзентацыі плануюцца на лета.
«Нам было важна перадаць атмасферу жывога выкананання. Кожны спрабаваў розныя падыходы і манеры, самая цікавая версія фіксавалася як фінальная. Пры прадакшне галоўным было не згубіць адчуванне невялікага клуба, дзе чуваць, як ходзяць мяхі акардэона, як робіцца каўток віна паміж песнямі», – кажа саундпрадусар альбому Аляксандр Ясінскі.
«Гэта вельмі беларускі і вельмі пражскі альбом. Ён вельмі дыялогавы па тым як ён ствараўся, ад першасных ідэяў кожнага засталося працэнтаў дзесяць, такі станоўчы узаемаабмен ў гасподзе. Фінальны прадукт аказаўся трохі болей сур’ёзным, чым планавалася, але пару разоў добра так выбухае, як беларускі менталітэт», – дадае Байсан.
Баяніст Аляксандр Ясінскі вядомы ў Беларусі і Чэхіі як музыка, кампазітар, удзельнік гуртоў Shum Davar, Iva Marešová, Bosae Sonca. Baisan (Алесь Плотка) – пладавіты паэт і перакладчык, піянер беларускай «лічбавай паэзіі», жыў у Празе ў 2018-2020 гг на рэзідэнцыі часопіса «ЛітРАЖ». Для шырэйшага азнаямлення з творчасцю кожнага добра падыйдуць свежы альбом Shum Davar «Folklore Fusions» і кнігі «Лотас на асфальце» (Алесь Плотка) і «Папяросы» (яго ж пераклад Юрка Іздрыка).
Алесь Плотка/аз