Пасля жнівеньскіх падзей у Беларусі 2020 года шматлікія грамадзяне краіны былі прымушаныя пакінуць радзіму з-за рэпрэсій. Паводле падлікаў, на працягу двух гадоў з Беларусі выехала больш за 300 тыс. чалавек, перш за ўсё высокакваліфікаваных спецыялістаў і маладых людзей. У якасці прыстанішча многія выбралі суседнія краіны, у тым ліку Польшчу і Літву.
Сёння мы раскажам пра беларускую эміграцыю новай хвалі ў Вільні вачамі вонкавага назіральніка. Ім з’яўляецца літаратар і культурны актывіст Андрэй Антонаў, які ў літоўскай сталіцы жыве шмат гадоў.
Андрэй Антонаў
Наш суразмоўца гаворыць, што беларусаў сапраўды стала бачна ў Вільні, асабліва людзей з вышэйшымі даходамі, якіх можна заўважыць у дарагіх кавярнях. Беларускае культурнае і грамадскае жыццё таксама стала багацейшым: пабольшала выставаў, іншых мерапрыемстваў, а некаторыя культурныя пляцоўкі «загружаныя даволі моцна».
«У Вільні існуе беларуская парафія. Я неяк зайшоў у касцёл і быў шакаваны аншлагам, хоць звычайна там было 5-7 чалавек. Цяпер жа касцёл поўны», – гаворыць Андрэй Антонаў.
Наш суразмоўца таксама кажа, што адносіны літоўцаў да беларусаў новай эміграцыі нейтральныя, у вялікай ступені таксама таму, што карэнныя жыхары Літвы – спакойныя людзі.
падрабязнасці інтэрв’ю – слухайце аўдыёфайл
З Андрэем Антонавым размаўляе Валеры Саўко.
фота ў тэксце: прыватны архіў Андрэя Антонава