Джордж Кэнан першым сфармуляваў амерыканскую стратэгію стрымання.
Стратэгія стрымання была першым сур’ёзным геапалітычным падыходам ЗША да палітыкі СССР пасля заканчэння Другой Сусветнай вайны.
Джордж Кэнан з 1944 году быў амерыканскім амбасадарам у СССР і даволі крытычна адносіўся да савецкай палітычнай сістэмы, а таксама да амерыканскага аптымізму ў дачыненні да Савецкага Саюзу.
У 1946 годзе амерыканскае Міністэрства Скарбу запытала амерыканскую амбасаду, чаму Масква не падтрымлівае створаны Сусветны Банк і Міжнародны Валютны Фонд. У адказ Кэнан напісаў сваё меркаванне наконт СССР, якое атрымала назву «Доўгая тэлеграма». Вашынгтон атрымаў яе 22 лютага.
У гэтай «Доўгай тэлеграме» было прадстаўлена становішча, якоя і паклала асновы амерыканскай палітыкі халоднай вайны.
У першай частцы тэлеграмы былі прадстаўленыя асноўныя погляды на палітыку СССР. Па-першае, СССР накіроўваецца ў бок сталай вайны з капіталізмам і будзе ствараць умовы для варожасці паміж рознымі краінамі і сацыяльнымі групамі, каб падарваць стабільнасць і распаўсюдзіць свае ўплывы; па-другое, будзе выкарыстоўваць кантралюемых марксістаў у капіталістычным свеце як саюзнікаў; па-трэцяе, Савецкі Саюз будзе распаўсюджваць свой уплыў на краіны 3-га свету, якія вызваліліся з каланіяльнай залежнасці; па-чацвёртае, савецкая агрэсія ў сваіх падставах не завязана з поглядамі савецкіх грамадзянаў ці эканамічнымі рэаліямі, але яе карані ляжаць у гісторыі расійскага нацыяналізму і неўрозу палітыкаў.
На думку Кэнана, для Савецкага Саюзу мірнае суіснаванне з капіталістычным светам не магчыма. Разам з гэтым, амерыканскі амбасадар раскрываў слабасці савецкай імперыі і прапаноўваў ЗША адпаведную стратэгію, якая б магла стаць сур’ёзным выклікам для СССР без шырокага вайсковага канфлікту. Кэнан сцвярджаў, што ў параўнанні з Заходнім светам Савецкі Саюз вельмі слабы і ўразлівы на ўнутраную нестабільнасць.
Злучаныя Штаты павінны распрацаваць доўгатэрміновую стратэгію, якая будзе абапірацца на «стрыманне», таксама праз дэманстрацыю сілы, і не дазволіць СССР выйсці па-за межы сваёй сферы ўплыву.
Але асноўнае, што падкрэсліў Кэнан, гэта неабходнасць вырашыць сацыяльныя і эканамічныя праблемы Захаду, каб Масква не змагла іх выкарыстаць для дэстабілізацыі ЗША і Захаду.
Гэтая тэлеграма мела шырокі ўплыў на фарміраванне знешнепалітычнай стратэгіі ЗША і ўнутранай палітыкі на доўгія гады.
Павал Усаў