Латвійскае грамадства павінна быць гатовым да любога крызісу, у тым ліку вайны, заявіў у інтэрв'ю Польскаму агенцтву друку (PAP) міністр абароны краіны Арціс Пабрыкс, які абвясціў аб аднаўленні абавязковай вайсковай службы – то-бок – прызыву.
Для ўмацавання абароны Латвіі патрэбныя «разуменне, дадатковыя рэсурсы, большая прысутнасць (сіл саюзнікаў) на месцах», сказаў міністр. «Думаю, што мы на правільным шляху. З пункту гледжання рашэнняў саміт НАТА ў Мадрыдзе быў вельмі пазітыўным: мы дамовіліся на працягу некалькіх гадоў стварыць міжнародную брыгаду», – адзначыў ваенны.
Што тычыцца ўнутранай дзейнасці, то ўлады хочуць, каб краіна была як «вожык з іголкамі», параўноўвае Пабрыкс. Паводле яго, Латвія ўводзіць абавязковую ваенную службу, плануе ўмацаваць абронную прамысловасць, каб забяспечыць краіну неабходным узбраеннем, і плануе павялічыць выдаткі на абарону да 3% ВУП.
«Мы таксама праводзім шмат асветніцкіх мерапрыемстваў, размаўляем з грамадствам, каб яно было гатовым да любога крызісу, у тым ліку вайны», – дадаў міністр.
Як патлумачыў Польскаму агенцтву друку Пабрыкс, увядзенню абавязковай вайсковай службы будзе папярэднічаць пяцігадовы пераходны перыяд. Абавязковы прызыў пачнецца з 2028 года.
«Мы пачнем з невялікай колькасці людзей, якія будуць прызывацца, потым будзем павялічваць гэтую колькасць», – сказаў Пабрыкс, які прапанаваў аднавіць службу, адмененую ў 2000-я гады, з уступленнем кріаны ў НАТА. Жанчыны таксама змогуць паступаць на службу на добраахвотнай аснове. Адметна, што прэзідэнт Латвіі Эгілс Левітс выказаўся за тое, каб служба была абавязковай для ўсіх, незалежна ад полу.
«Калі народ Латвіі хоча быць гатовым адстойваць сваю свабоду і краіну, ён павінен быць гатовы да гэтай службы», – кажа Пабрыкс. Новыя палажэнне яшчэ павінен быць ухвалены ў другім чытанні Соймам.
Адказваючы на пытанне аб гібрыдных пагрозах, кіраўнік абарончага ведамства Латвіі сказаў, што яго краіна «дзесяцігоддзямі мае справу з імі». Сярод такіх мерапрыемстваў ён назваў кібератакі і інфармацыйныя атакі. «Гэта нашы будні. Для нас у гэтым няма нічога новага», – ацаніў ён.
эж