З 21 кастрычніка пачаліся выступы кандыдатаў у дэпутаты Палаты прадстаўнікоў сёмага склікання па тэлебачанні і радыё.
Усе кандыдаты па Брэсцкай, Віцебскай, Гомельскай, Гродзенскай і Магілёўскай вобласцях, а таксама па горадзе Мінску атрымалі магчымасць выступіць на тэлеканале «Беларусь 3», а па Мінскай вобласці – на СТВ, пведамляюць «Праваабаронцы за свабодныя выбары».
Выступы пройдуць у працоўныя дні па 6 лістапада. Працягласць кожнага абмежаваная пяццю хвілінамі.
Па тэлебачанні яны будуць транслявацца ў вячэрні прайм-тайм – з 19.00 да 20.40. Выключэнне – 22 і 29 кастрычніка, калі эфірны час прадстаўляецца з 19.00 да 19.30.
Радыёвыступы можна будзе паслухаць з 7.00 да 8.00. Эфірны час кандыдатаў, якія будуць балатавацца па Мінску, выдзеліць «Радыё-Мінск», па Мінскай вобласці – радыёстанцыя «Мінская хваля». Тым, хто будзе вылучацца па іншых вобласцях, час дадуць абласныя тэлерадыёкампаніі.
Парадак арганізацыі і правядзення дэбатаў, даты іх правядзення і вядоўцу вызначаць тэлерадыёкампаніі. Эфірны час рэзервуецца з разліку не больш за пяць хвілін на аднаго кандыдата.
Кандыдаты яшчэ маюць права апублікаваць сваю перадвыбарчую праграму ў адной з рэспубліканскіх газет (»Звязда«, »Рэспубліка«), альбо абласной газеце, альбо ў гарадскіх ці раённых газетах, якія выдаюцца на тэрыторыі іх акругі.
Тэкст кандыдаты павінны прадставіць у СМІ не пазней 27 кастрычніка.
юл