У Кіраўскім раёне Магілёўшчыны ўвялі масачны рэжым, выезд абмежаваны - паведамляе Свабода. Адмысловае распараджэнне выдаў мясцовы райвыканкам «у сувязі з эпідэмічным становішчам і дзеля мінімізацыі рызыкі распаўсюджвання на тэрыторыі раёну інфекцыі, выкліканай каранавірусам COVID-19».
Дзейнічаць мера будзе да адмены распараджэння. Кантроль за яго выкананнем даручаны галоўнаму санітарнаму лекару раёну.
На сайце мясцовага цэнтру гігіены і эпідэміялогіі гаворыцца, што выкарыстоўванне масак насельніцтвам падчас наведвання публічных месцаў абавязковае.
Жыхарам раёну рэкамендавана «пазбягаць выезду за межы адміністрацыйнай тэрыторыі, за выключэннем пільнай неабходнасці».
Кіраўскі раён быў адным з першых на Магілёўшчыне, дзе выявілі каранавірусную інфекцыю. 4 красавіка галоўны санітарны лекар вобласці Святлана Нячай паведаміла, што на COVID-19 захварэў «працоўны мігрант, які вярнуўся з Масквы».
Цягам наступных двух месяцаў паведамленняў пра вострую сітуацыю з каранавірусам у раёне не з'яўлялася. Аператыўна высветліць, колькі там цяпер заражаных COVID-19, пакуль не ўдаецца. На сайце цэнтру гігіены і эпідэміялогіі такой статыстыкі няма.
Раней у Івейскім раёне Мінскай вобласці таксама ўвялі масачны рэжым, але праз дзень яго адмянілі.
нг