Праваабарончай супольнасці Беларусі стала вядома, што 1 ліпеня 2020 г. супрацоўнікамі ДФР КДК была затрыманая сябра ініцыятыўнай групы і асабістая памочніца Віктара Бабарыкі – Алена Карагачава. Паводле атрыманых звестак яна абвінавачваецца па ч.2 арт. 243 (ухіленне ад выплаты сумы падаткаў і збораў, што пацягнула шкоду ў асабліва буйным памеры) і змешчаная пад варту ў СІЗА КГБ, паведамляе сайт spring96.org
Адзін з каардынатараў ініцыятыўнай групы па вылучэнні кандыдатам у дэпутаты Віктара Бабарыкі Дзмітрый Карака быў затрыманы 18 чэрвеня 2020 г. разам з Эдуардам Бабарыкам па дарозе ў ТВК для здачы сабраных подпісаў. Ад моманту затрымання ён знаходзіцца пад вартай у СІЗА КГБ.
Паводле праваабаронцаў, прэзідэнцкая кампанія ад самага пачатку адбываецца ва ўмовах запалохвання грамадства, пагрозаў і ціску, у тым ліку ў дачыненні да непасрэдных удзельнікаў выбарчай кампаніі – вылучэнцаў у кандыдаты і сябраў іх ініцыятыўных груп.
Улічваючы дадзеныя акалічнасці, праваабаронцы робяць выснову, што рэальнымі падставамі крымінальнага пераследу Віктара Бабарыкі і сябраў ягонай ініцыятыўнай групы з’яўляюцца палітычныя матывы, скіраваныя на спыненне іх публічнай дзейнасці па вылучэнні Бабарыкі ў якасці кандыдата ў Прэзідэнты Рэспублікі Беларусь і далейшым удзеле ў выбарах.
Удзел у кіраванні краіны праз працэдуру перыядычных, свабодных і дэмакратычных выбараў з’яўляецца адной са свабодаў, рэалізацыя якой гарантаваная грамадзянам Беларусі, як Канстытуцый, так і міжнароднымі нормамі ў галіне правоў чалавека, у прыватнасці, Міжнародным пактам аб грамадзянскіх і палітычных правах.
У сувязі з гэтым, мы прадстаўнікі беларускай праваабарончай супольнасці, падцвярджаючы сваю пазіцыю, выкладзеную ў заяве аб прызнанні Віктара Бабарыкі і затрыманых сябраў ягонай ініцыятыўнай групы ад 19 чэрвеня 2020 г. заяўляем аб прызнанні Алены Карагачавай і Дзмітрыя Карака палітычнымі зняволенымі і патрабуем іх неадкладнага і безумоўнага вызвалення.
аз