Гарадская пракуратура перадала ў суд Кастрычніцкага раёна крымінальную
справу ў дачыненні да віцябляніна, якога вінавацяць у здзяйсненні гвалту
і пагрозе гвалтам да службовай асобы, што выконвала службовыя абавязкі
па ахове грамадскага парадку і спыненню парушэнняў права.
Паводле матэрыялаў гэтай крымінальнай справы, мужчына браў удзел у маршы па
вуліцах Віцебска, які адбыўся 6 верасня. Падчас гэтай акцыі сілавікі
ўжылі слезацечны газ. Аднак у кіраванні ўнутраных спраў тады заявілі,
што пратэстоўцы самі распылілі газ пры спробе затрымання невядомага,
які «здзейсніў удар у вобласць галавы» супрацоўніку міліцыі.
Пракуратура Віцебска, вывучыўшы матэрыялы гэтай крымінальнай справы,
палічыла, што ўсе акалічнасці злачынства аб'ектыўна даследаваны, а
высунутае абвінавачанне па частцы 1 артыкула 366 КК – абгрунтаванае,
паведамляе служба інфармацыі пракуратуры Віцебскай вобласці.
Віцябляніну пагражае да 5 гадоў пазбаўлення волі.
Для Беларускай службы Польскага радыё з Віцебску Святаслаў Бруйко