У розных мікрараёнах Мінска адбылося каля 60 шэсцяў пратэсту. У іх узялі ўдзел некалькі дзясяткаў тысяч чалавек. Найбольшыя шэсці, з удзелам некалькіх тысяч жыхароў кожнае, адбыліся ў Дамброўцы і на Захадзе. Масавыя шэсці адбыліся таксама на Паўднёвым Захадзе, ва Уруччы і на Партызанскім праспекце.
У Зялёным Бары жыхары акружылі АМАПаўцаў. Тыя распылілі ў твар пратэстоўцаў газ і стралялі – паведамляюць ТК.
Аднак і пасля гэтага людзі не разбегліся, крычалі на сілавікоў, пакуль яны не з'ехалі.
Сілавікі нязменна жорстка разганялі дэманстрантаў. Ужывалі святлошумавыя прылады.
ТК змяшчаюць відэазапіс затрымання і збіцця да непрытомнасці маладога чалавека, паказваюць як хуткая падʼехала да аўтазака.
Затрымлівалі не толькі маладых. Інтэрнэт абабеглі фота, на якім сілавікі ўцягваюць пажылога мужчыну з цыгарэтам і пакетам. Відавочцы дамагаліся вызвалення мужчыну.
На вуліцы Рафіева ў Мінску затрымлівалі жанчын. Сілавікі зладзілі хапун у дварах.
Затрыманні адбываліся па ўсёй Беларусі. Праваабарончы цэнтр «Вясна» апублікаваў спіс 206 затрыманых. Спіс папаўняецца. Сярод затрыманых выбітны эканаміст, член Каардынацыйнай рады Дзмітрый Крук і актрыса Алена Гіронак (Пабягаева), выканаўца галоўнай жаночай ролі ў фільме «Купала».
Акцыі пратэсту адбыліся ў некалькіх дзясятках лакацый Брэста,Гродна, Гомеля, Магілёва, Віцебска, у Жодзіне, Смалявічах, Дзяржынску, Бараўлянах, Радашкавічах, Ляхавічах, Пружанах і іншых гарадах і пасёлках. Жыхарам Лагойска не давалі гуляць пад бел-чырвона-белымі парасонамі, нягледзячы на мокрае надворʼе.
яс/паводле ТК «Нашай нівы»