Пра гэта паведамляецца на афіцыйнай старонцы БМЗ у сацсетцы «Укантакце». 50% экспарту жлобінскага завода прыпадае на Еўропу.
У паведамленні БМЗ гаворыцца, што ў апошні час «розныя некамерцыйныя арганізацыі накіроўваюць на адрас замежных партнёраў БМЗ лісты, у якіх па надуманых прычынах заклікаюць спыніць супрацоўніцтва». У сувязі з гэтым работнікі БМЗ звяртаюцца з адкрытым лістом да «замежных партнёраў, удзельнікаў міжнароднага прафсаюзнага руху, прадстаўнікоў краін Еўрапейскага Саюза і іншых дзяржаў».
- Мы рашуча супраць таго, каб нас выкарыстоўвалі як сродак у дасягненні нечых палітычных мэтаў, асабліва калі гэта спалучана з пагрозамі эканамічнай устойлівасці прадпрыемства, – гаворыцца ў лісце.
Сёння на БМЗ працуе звыш 11 тысяч чалавек, адзначылі аўтары паслання.
Раней кіраўніцтва глабальнага прафсаюза IndustriALL, які прадстаўляе інтарэсы 50 мільёнаў працоўных, занятых у горназдабыўной, энергетычнай і перапрацоўчых галінах, звярнулася да генеральнага дырэктара БМЗ Дзмітрыя Корчыка з заклікам не парушаць правы рабочых і «аднавіць усіх несправядліва звольненых работнікаў, спыніць уціск і пераслед сябраў прафсаюза і зарэгістраваць ячэйку Беларускага незалежнага прафсаюза (БНП) на БМЗ ».
У пачатку лютага адзін з найбуйнейшых сусветных вытворцаў шын Michelin ўжо звяртаўся да кіраўніцтва БМЗ з нагоды парушэння правоў работнікаў.
яс/паводле news.tut.by