Аляксандр Калеснікаў распавёў, што гаварыў з дачкой праз шкло па тэлефоне гадзіну.
Яна выглядае бадзёрай, шмат чытае і сочыць за навінамі.
«Просьба Машы – удакладніць, ці можна падпісацца на "Новую газету" і часопіс Esquire. Яна ў курсе, што галоўнаму рэдактару "НГ" уручана Нобелеўская прэмія. Машу гэта захапіла, і яна прасіла перадаць свае велізарныя віншаванні Дзмітрыю Муратаву», — сказаў Калеснікаў.
Марыя таксама ўзгадала пра прэмію ў галіне правоў чалавека імя Вацлава Гаўла, якую ёй прысудзілі. Яна падкрэсліла, што вельмі ганарыцца гэтай узнагародай і лічыць, што гэтая прэмія – для ўсіх палітвязьняў.
Калеснікава перадала прывітанне пісьменніцы і Нобелеўскай лаўрэатцы Святлане Алексіевіч, дачцэ Віктара Бабарыкі Марыі, усім сябрам і паплечнікам.
Палітвязням, каардынатарам штаба Віктара Бабарыкі на прэзідэнцкіх выбарах 2020 года Марыі Калеснікавай і юрысту штаба Максіму Знаку 6 верасня вынеслі прысуд: 11 гадоў калоніі агульнага рэжыму і 10 гадоў ўзмоцненага адпаведна. Прысуд пакуль не ўступіў у законную сілу. Адвакаты рыхтуюць скаргу.
Справу суд разгледзеў за месяц: першае паседжанне прайшло 4 жніўня. Працэс вёў суддзя Сяргей Епіхаў. Калеснікаву і Знака абвінавацілі ў спробе захопу ўлады, публічных закліках да дзеянняў, накіраваных на прычыненне шкоды нацыянальнай бяспецы, і стварэнні экстрэмісцкага фарміравання. Калеснікаву ўзялі пад варту 8 верасня 2020 года. За дзень да гэтага невядомыя выкралі яе ў цэнтры Мінска і спрабавалі вывезці з краіны, аднак на беларуска-ўкраінскай мяжы яна парвала пашпарт. 9 верасня затрымалі Максіма Знака. Упершыню пасля арышту Калеснікава сустрэлася з бацькам у СІЗА праз год пасля яе затрымання і на наступны дзень пасля абвяшчэння прысуду – 7 верасня.
naviny.online / вх