Завершваецца падрыхтоўка першага палёту медычнага дрону. Беспілотны лятальны апарат перавязе кроў. Дрон вырушыць у палёт з левабярэжнай Варшавы з Цэнтру пералівання крыві, што месціцца ў раёне Саская Кэмпа і накіруецца ў падваршаўскі Анін, у Цэнтр кардыялогіі.
Дастаўку крыві здзейсніць дрон Hermes. Яго канструктар Славамір Гучала пераконвае, што лятальны апарат з’яўляецца не дронам, а драноідам:
-На самой справе, гэта цалкам камп'ютарызаваны лятаючы робат. Ім кіруе не адзін кампʼютар, драноід мае мноства сістэмаў і датчыкаў. Прылада валодае дасканалай сістэмай кіравання і кантролю.
Завадатарам палётаў медычных дронаў стаў старшыня Польскай палаты беспілотных апаратаў Дар’юш Вершнэр. Праект распрацоўваюць цягам трох гадоў. Драноід Hermes вырушыць у першы рэйс над Варшавай ужо ў бліжэйшую сераду, 20 лістапада.
IAR/эж