У аўторак, 7 красавіка з каранавірусам у Польшчы змагаюцца 8780 вайскоўцаў і 1248 адзінак тэхнікі, паведаміў міністр нацыянальнай абароны Польшчы Мар'юш Блашчак.
«Вайскоўцы сумесна з Памежнай вартай абараняюць межы, сумесна з паліцыяй патрулююць вуліцы, падтрымліваюць сістэму аховы здароўя і ажыццяўляюць гарачую тэлефонную лінію псіхалагічнай дапамогі», – напісаў міністр у аўторак сацыяльнай сетцы Twitter.
Жаўнеры супрацоўнічаюць з іншымі спецслужбамі і Міністэрствам аховы здароўя падчас ажыццяўлення захадаў, накіраваных на спыненне распаўсюджвання каранавіруса. Польскае войска дапамагае людзям сталага ўзросту і тым, хто знаходзіцца на каранціне. Міністэрства трымае ў гатовасці 14 ваенных шпіталяў і пяць цэнтраў прафілактычнай медыцыны.
Тым часам эпідэмія каранавіруса шырыцца Польшчай. Станам на 7 красавіка тут было 4532 інфікаваных, 111 пацыентаў з COVID-19 памерлі.
TVP/эж