Перамовы з патэнцыйнымі атрымальнікамі нафты ў Беларусі блізкія да завяршэння, – заявіў віцэ-прэзідэнт PERN Рафал Міланд.
Да канца году павінны быць завершаны будаўнічыя работы, якія дазваляюць транспартаваць нафту па трубе «Дружба» з Польшчы ва ўсходнім напрамку.
Як заявіў Міланд, будаўнічыя работы накіраваныя на тое, каб зрабіць магчымым падачу нафты з базы PERN каля Плоцка ў базу ў Адамаве каля мяжы з Беларуссю. Работы працягваюцца і павінны быць завершаны да канца 2020 года.
«Асобным пытаннем у перамовах з беларускімі кліентамі, з'яўляецца заключэнне адпаведнага камерцыйнага пагаднення, якое дазволіла б ажыццяўляць фактычную пастаўку ў Беларусь», – дадаў віцэ-прэзідэнт PERN.
«Перамовы працягваюцца. Не магу пакуль сказаць, што яны былі паспяховымі, але яны ўжо блізкія да завяршэння», – падкрэсліў Рафал Міланд.
Прадпрыемства эксплуатацыі нафтаправодаў PERN (Przedsiębiorstwo Eksploatacji Rurociągów Naftowych) – гэта стратэгічная польская дзяржаўная кампанія, адказная за пастаўкі нафты ў айчынныя НПЗ: PKN Orlen у Плоцку і Grupa Lotos у Гданьску, а таксама на два нафтаперапрацоўчыя заводы ў Германіі. PERN нясе таксама адказнасць за захоўванне сырой нафты і паліва.