Штабы кандыдатаў на пасаду прэзідэнта Польшчы не могуць дамовіцца, дзе кандыдаты сустрэнуцца на перадвыбарчых дэбатах. Заўтра Польскае грамадскае тэлебачанне ладзіць дэбаты ў мясцовасці Коньске, на якія запрошаны як актуальны прэзідэнт, прадстаўнік партыі «права і справядлівасць» Анджэй Дуда, так і яго супернік, мэр Варшавы і віцэ-старшыня партыі «Грамадзянская платформа» Рафал Тшаскоўскі.
Анджэй Дуда згадзіўся ўдзельнічаць у дэбатах Польскага тэлебачання, але Тшаскоўскі запрашае свайго апанента на іншую сустрэчу, падчас якой прапануе дэбатаваць пра будучыню Польшчы – у горад Лешна.
Дэбаты адбудуцца ў панядзелак вечарам. Такім чынам, хутчэй за ўсё кандыдаты ў прэзідэнты не сустрэнуцца на дэбатах.
Другі тур прэзідэнцкіх выбараў пройдзе ў Польшчы 12 ліпеня.
нг