Намеснік старшыні Інстытута нацыянальнай памяці, прафесар Кшыштаф Швагжык, які адказваў за пошукі, заявіў Польскаму радыё, што цяперашняя дзейнасць яго каманды – гэта працяг леташніх пошукаў.
- Ідзецца пра месца, дзе мы знайшлі парэшткі 18 чалавек восенню і летам мінулага года. Як мы падазраем, тых людзей забілі ў гэтай турме, а потым пахавалі ва ўнутраным дворыку і каля сцяны турмы. Мэта нашага вяртання сюды ў гэтым годзе - пашырыць аб'ём пошукаў на іншую тэрыторыю ля сцяны турмы і знайсці рэшткі тых, каго да гэтага часу не ўдалося знайсці.
Прафесар Кшыштаф Швагжык нагадаў, што "Таледа" - гэта месца расстрэлу соцень людзей.
- Мы мяркуем, што больш за ўсё людзей было забіта, а потым пахавана ў 1944 - 1947 гады. Прынамсі ідзецца пра 136 пакараных смерцю і невядомую колькасць, я думаю, што шмат дзесяткаў чалавек, закатаваных тут. Агулам не менш за 200 чалавек.
Як дадаў віцэ-прэзідэнт Інстытута нацыянальнай памяці, не выключана, што большасць ахвяр былі пахаваны на тэрыторыі турмы. Ён таксама нагадаў, што некалькі гадоў таму на могілках у Брудне былі знойдзены астанкі больш за 20 чалавек, пакараных смерцю ў камеры катаванняў НКУС / УБ з турмы на вуліцы Намыслоўскай.
Цяперашні этап прац Інстытута нацыянальнай памяці на месцы былой турмы "Таледа" працягнецца да канца красавіка. Аднак ужо вядома, што на гэтым пошукі не скончацца.
ПР/юл