Офіс Святланы Ціханоўскай і Беларускі дом у Варшаве сталі лаўрэатамі спецыяльнай узнагароды XVIII Польскай прэміі імя Вярхоўнага камісара ААН па правах чалавека Сержыу Віэйра ды Мэлу. Узнагарода называецца польскім «Оскарам» у галіне правоў чалавека.
«Мы жадаем, каб сённяшняя ўзнагарода стала доказам нашай падтрымкі для беларускага народу ў абліччы жорсткай палітыкі рэжыму Лукашэнкі», – сказаў дырэктар дэпартаменту Аб'яднаных нацый і правоў чалавека МЗС Польшчы Павел Радомскі.
- Мы жадаем, каб беларусы ведалі, што мы пра іх памятаем, што бачым іх драматычную барацьбу і жадаем такім сімвалічным спосабам падтрымаць іх веру ў перамогу. Мы спадзяемся, што сённяшняя прэмія будзе спрыяць падтрымцы дабрачынных арганізацый у іх барацьбе за свабодную і дэмакратычную Беларусь.
Летась лаўрэатам Польскай прэміі імя Вярхоўнага камісара ААН па правах чалавека Сержыу Віэйра ды Мэлу была праваабарончая арганізацыя з Беларусі «Вясна», а яшчэ раней Аляксандр Мілінкевіч.
яс