Беларуская мастачка Яна Шостак атрымала прэмію на 29 польскім конкурсе «Paszporty Polityki» ў намінацыі візуальнае мастацтва
Журы адзначыла, што ў Яны атрымалася прыцягнуць увагу польскай і сусветнай супольнасці да праблем Беларусі і бежанцаў. Яе вядомы перформанс называецца «Хвіліна крыку для Беларусі».
Падчас урачыстасці мастачка зачытала ліст сваякам палітзняволеных.
- Я сёння ў сукенцы, на якой выявы 1200 палітвязняў, несправядлівых закладнікаў беларускага рэжыму. Я хачу вам падзякаваць за выхаванне такіх адважных і непахісных людзей. Я плачу над кожным з вас, калі думаю, у колькі абыходзіцца вам вашая самаахвярнасць.
Яна Шостак скончыла прамову «хвілінай крыку для Беларусі» – яе падтрымала ўся зала.
Прэмію «Paszporty Polityki» ўстанавіў і прызнае часопіс Polityka. Згодна з заявай Рэдакцыі, прэмія зʼяўляецца адзнакай для творцаў, якія найбольш хутка развіваюцца, здзіўляюць новымі дасягненнямі, і, такім чынам, заслугоўваюць клопату, падтрымкі і прасоўвання ў свеце. Назва прэміі -«Пашпарт» – павінна была стаць сімвалічным пропускам у свет вялікага міжнароднага мастацтва.
яс