Упаўнаважаны польскага ўраду па бяспецы інфармацыйнай прасторы Польшчы Станіслаў Жарын лічыць, што апошнія дасягненні ўкраінскіх узброеных сіл на полі бою пацвярджаюць правільнасць рашэння аб перадачы Украіне зброі, прынятага на пачатку расійскай агрэсіі. Аднак гэта не значыць, што ў вайне наступіў пералом. Расіяне рыхтуюцца да наступнага этапу ўварвання.
Паводле яго, украінцы даказалі, што ўмеюць эфектыўна выкарыстоўваць не толькі тэхніку старога пакалення, але і сучасныя сістэмы. Яны дэманструюць крэатыўнасць, нестандартны падыход і высокі маральны дух.
Станіслаў Жарын падкрэслівае, што падтрымку трэба працягваць, паколькі толькі няўдачы на полі бою могуць перашкодзіць палітычным планам Расіі ў дачыненні да Украіны і прымусіць ворага адступіць.
На яго думку, рашэнне аб частковай мабілізацыі і абвяшчэнне рэферэндумаў на акупаваных тэрыторыях Украіны зʼяўляюцца відавочным сігналам таго, што Расія не мае намеру спыняць уварванне, але можа прайсці да наступнага этапу агрэсіі.
Станіслаў Жарын падкрэслівае, што ў Расіі, нягледзячы на велізарны ціск цэнзуры, усё часцей гучаць галасы, якія ставяць пад сумнеў легітымнасць вайны, якая замест таго, каб даказваць сілу Расіі, дае ўсё новыя прыклады яе слабасці. Ён дадае, што расійская эканоміка ўжо адчувае наступствы санкцый, уведзеных пасля агрэсіі супраць Украіны.
IAR/аз