Два расійскія агенты, выяўленыя і арыштаваныя Агенцтвам выведкі і бяспекі Славеніі, заявілі, што з'яўляюцца грамадзянамі краін Паўднёвай Амерыкі. Паводле неафіцыйнай інфармацыі славенскай прэсы, як мінімум у аднаго з іх быў аргентынскі пашпарт, яны не раскрывалі свайго сапраўднага паходжання. У сталіцы Славеніі Любляне яны арандавалі офіс у адным з хмарачосаў і вялі там свой бізнес з нерухомасцю і антыкварыятам.
Славенская контрвыведка супрацоўнічала са службамі іншых краін у выяўленні агентаў. Выяўленая шпіёнская ячэйка з Любляны павінна была весці свае аперацыі не толькі ў Славеніі, але і ў іншых краінах рэгіёну. Як піша газета «Delo», двое затрыманых працавалі на расійскую вайсковую разведку ГРУ. Яны былі часткай разрозненай сеткі добра падрыхтаваных «спячых агентаў».
За апошні год такія шпіёны былі выяўленыя ў многіх іншых еўрапейскіх краінах, у тым ліку ў Вялікабрытаніі, Германіі, Нідэрландах, Нарвегіі, Швецыі, Балгарыі, Венгрыі і Славакіі.
Паводле славенскага заканадаўства, за шпіянаж і дачу ілжывых паказанняў пагражае восем гадоў турэмнага зняволення.
IAR/нг