Падтрымка палякамі Майданскай рэвалюцыі стала тэмай кнігі «Польская салідарнасць з Майданам», якая выйшла ва Украіне. Гэта між іншым успаміны палякаў, якія падтрымлівалі ўкраінскую рэвалюцыю годнасці.
Як зазначае адзін з рэдактараў кнігі – Леанід Фіндберг, палякі, як ніводзін іншы народ, далучыліся да дапамогі ўкраінскай рэвалюцыі годнасці шэсць гадоў таму. Як ён падкрэслівае – польская салідарнасць з Майданам з украінскага пункту гледжання была найбольш эфектыўнай і самай вялікай. На яго думку, гэта адбылося па зразумелых прычынах, таму што і палякі, і ўкраінцы прытрымліваюцца лозунга «За нашу і вашу свабоду».
Леанід Фіндберг дадае, што асноўная частка тэкстаў, якія змяшчаюцца ў кнізе, – гэта запісы ўспамінаў людзей, якія арганізавалі дапамогу на Майдан у Польшчы – у тым ліку лекараў, валанцёраў, тых, хто збіраў грошы і вопратку, тых, хто перавозіў медыцынскую і іншую дапамогу праз мяжу.
Антыўрадавыя акцыі пратэсту на Майдане пачаліся ў канцы восені 2013 года з-за няздольнасці каманды прэзідэнта Віктара Януковіча падпісаць пагадненне аб асацыяцыі з Еўрапейскім саюзам.
Пратэсты ў цэнтры ўкраінскай сталіцы доўжыліся да канца лютага 2014 года і прымусілі тагачасныя ўлады ўцячы ў Расію. Яны скончыліся крывавым разгонам, больш за 80 дэманстрантаў былі забітыя службамі правапарадку.
ІАР ПР/нг