Міністэрства замежных спраў Чэхіі запатрабуе ад Расіі тлумачэнняў у сувязі з блакаваннем сайтаў чэшскага грамадскага радыё.
Дыпламатычная нота па гэтым пытанні павінна быць перададзена ў бліжэйшыя дні.
У мінулыя выходныя было абвешчана, што Расія блакуе сайт міжнароднай службы чэшскага грамадскага радыё «Радыё Прага».
Прычынай блакавання стаў артыкул пра самаспаленне Яна Палаха ў знак пратэсту супраць уварвання войскаў Варшаўскага дагавора ў Чэхаславакію. Расійскія чыноўнікі сцвярджалі, што тэкст 2001 года пра Яна Палаха заахвочваў да самагубства.
«Блакаванне нашых сайтаў – беспрэцэдэнтны крок», – сказала галоўны рэдактар станцыі Клара Стэйскалёва. «Чэшскае радыё ўжо звярталася за тлумачэннямі да расійскіх улад, але, улічваючы тое, як Расія ставіцца да сродкаў масавай інфармацыі і свабоды слова, перамовы могуць быць цяжкімі. Аднак няма разумнай прычыны, каб нашы сайты былі заблакаваныя», – падкрэсліла Клара Стэйскалёва.
яс