Кіраўнік Службы вайсковай разведкі Даніі Ларс Фіндсен застанецца пад вартай. Яго затрымалі ў сувязі з уцечкай сакрэтнай інфармацыі. У снежні па гэтай справе былі затрыманыя чацвёра цяперашніх і былых супрацоўнікаў дацкіх спецслужбаў.
Сёння суд вырашыў, што за кратамі застанецца толькі кіраўнік разведкі. Ларс Фіндсен сказаў, што ён невінаваты, а абвінавачанні, якія яму выставілі, назваў «вар'яцкімі».
Дакладны змест абвінавачання невядомы, невядома таксама, якая сакрэтная інфармацыя была раскрытая і каму яна была перададзеная. Дацкія СМІ паведамляюць, што гаворка ідзе пра прэсу.
Паводле агенцтва Reuters, справа можа быць звязана з раскрыццём у 2020 годзе дацкім грамадскім тэлеканалам DR News інфармацыі аб тым, што вайсковая разведка перадала Агенцтву нацыянальнай бяспекі ЗША тэлекамунікацыйныя дадзеныя, якія дазволілі амерыканскай службе атрымаць доступ да асабістых даных і прыватных размоў грамадзян Даніі.
ІAR/аз