Двое грамадзян Германіі ваявалі на баку Расіі ў групоўцы Вагнера. Пра іх затрыманне пад Бахмутам паведамляе «Tagesspiegel».
Нямецкая газета спасылаецца на словы 21-гадовага немца, які ваюе на баку Украіны. Інфарматар з меркаванняў бяспекі застаецца ананімным.
«Двое зняволеных мелі нямецкія пашпарты. Адзін быў з Лейпцыга і меў рускія карані. Другі Фолкер паходзіў з Берліна. Паколькі абодва яны дрэнна валодалі англійскай мовай, мяне адправілі з імі ў Кіеў, дзе я выконваў абавязкі перакладчыка на допыце», – расказаў малады немец, вядомы ва Украіне як Бэн Каўлер.
Па яго словах, Фолкер доўгі час быў беспрацоўным і ў верасні з'ехаў у Расію, каб далучыцца да войскаў Вагнера. У яго не было ваеннага вопыту. Найміт групы Вагнера атрымліваў $5000 плюс надбаўкі, агулам $7000. Фолкер расказаў што дадатковыя $10 тысяч долараў ён бы атрымаў за забіццё замежніка, які ваюе па ўкраінскім боку, і прадʼявіць пашпарт забітага.
Нямецкі добраахвотнік, які ваюе за Украіну, паведаміў, што сярод затрыманых таксама амерыканец, француз, брытанец і сірыец.
Групоўка Вагнера – прыватная армія Яўгена Прыгожына па мянушцы «кухар Пуціна».
Крыніца: rp.pl / «Tagesspiegel»/Do Rzeczy/яс