Украінскія ўлады прагназуюць неадкладны наступ Расіі

З'яўляецца ўсё больш прыкмет таго, што расіяне будуць наступаць з Луганскай вобласці.

Графіці італьянскага мастака TV Boy на знішчаным расійскім танку ў вёсцы Дзмітраўка Кіеўскай вобласці

PAP/Vladyslav Musiienko

Украінскія ўлады і аналітыкі прагназуюць узмацненне расійскага наступу. Гэта можа адбыцца ў бліжэйшыя тыдні. Найбольш верагодна, што расіяне нанясуць удар на Данбасе. У той жа час менавіта ў Данецкай і Луганскай абласцях украінцы адбіваюць расійскія штурмы. Тут таксама адбываюцца самыя напружаныя баі. Тэму працягвае карэспандэнт Польскага радыё Павел Бушка:

- За мінулыя суткі ўкраінскія абаронцы на Данбасе адбілі расійскі штурм на васмі ўчастках фронту, у тым ліку ў раёне горада Бахмут. Менавіта ў Данецкай і Луганскай абласцях расіяне могуць пачаць чарговы маштабны наступ, які непазбежны, лічыць сакратар Рады бяспекі Украіны Аляксей Данілаў. Паводле яго, вораг рыхтуецца да максімальнага ўзмацнення жорсткасці, збіраючы ўсе сілы і трэніруючы сваіх салдат. Аляксей Данілаў лічыць, што ў бліжэйшыя 2-3 тыдні магчымы любы сцэнар развіцця падзей.
У сваю чаргу ўкраінскі ваенны эксперт Сяргей Грабскі таксама лічыць, што асноўны ўдар будзе нанесены на ўсходнім участку фронту. Зʼяўляецца ўсё больш прыкмет таго, што расіяне будуць наступаць з Луганскай вобласці, дзе апошнім часам было адносна спакойна.

На думку экспертаў, расіяне таксама могуць актывізаваць атакі на поўдні – у Запарожскай вобласці, але яны будуць накіраваныя на прыкрыццё асноўнага наступу на ўсходзе.

IAR/аз