Ingenuity – так называецца невялікі верталёт-беспілотнік, які быў дастаўлены на Марс марсаходам Perseverance. Марсаход сеў на Чырвонай планеце 18 лютага. Пасля першых выпрабаванняў пачалася падрыхтоўка да палёту Ingenuity.
Першапачаткова палёт беспілотніка планаваўся «не раней за 8 красавіка». Потым NASA вырашыла перанесці гэты тэрмін на 11 красавіка, а затым - на 14 красавіка ці нават пазней. Аднак 12 красавіка было абвешчана, што затрымка будзе яшчэ большай.
Праблема ўзнікла падчас выпрабавання на Марсе вінта верталёта на вялікай хуткасці. NASA зазначае, што верталёт знаходзіцца ў бяспецы і ў добрым стане. Ужо выпраўлена праграмнае забеспячэнне для ліквідацыі праблемы з вінтом.
Падчас палёту беспілотнік будзе спажываць шмат энергіі – сотні ватаў. Батарэя, якая сілкуе рухавікі Ingenuity, павінна справіцца са скачкамі магутнасці, калі беспілотнік будзе змагацца з ветрам і яго парывамі. Дзеля гэтага неабходна забяспечыць дастатковы зарад батарэі. Праблемай з'яўляюцца таксама халодныя ночы на Марсе, пасля якіх у батарэі застаецца няшмат энергіі. Яна зараджаецца днём ад Сонца.
NASA вядзе інтэнсіўную падрыхтоўку да палёту беспілотніка Ingenuity на Марсе. Чакаецца, што дата першага палёту ў атмасферы іншай планеты будзе вызначаная на наступным тыдні.
яс