Як стала вядома «Радыё Свабода», неўзабаве гэты працэс можа яшчэ больш ускладніцца.
Журналістам стала вядома, што супрацоўнікі КДБ праяўляюць цікавасць да дзейнасці натарыяльных кантор, якія займаюцца афармленнем здзелак з нерухомасцю.
«Правяралі ўсіх, праводзілі гутаркі, як цяпер афармляць угоды з нерухомасцю. Заявілі, што трэба, перш чым аформіць здзелку, праверыць, ці ёсць чалавек у спісах тэрарыстаў ці экстрэмістаў. Калі так, то «паведаміць у органы«. Аднаго натарыуса затрымалі. Не ведаю, ці яна аформіла ўгоду «не таму, каму трэба«, ці знайшлі «кампрамат« у тэлефоне», – патлумачыла крыніца.
Паводле суразмоўцы, цяжкасці з афармленнем узнікаюць не толькі таму, што не працуюць даверанасці, аформленыя за мяжой. Яшчэ адна прычына ў тым, што многія адміністрацыйныя працэдуры пры продажы нерухомасці змянілі.
«Нам патлумачылі, што пасля натарыяльнай здзелкі кватэру трэба аформіць у БТІ (раней – Бюро тэхнічнай інвентарызацыі, цяпер – Агенцтва дзяржаўнай рэгістрацыі і кадастру. – Рэд.), прычым прадаўцу і пакупніку трэба з'явіцца ў БТІ асабіста. Інакш нерухомасць не зарэгіструеш», – кажа крыніца.
Суразмоўца прагназуе, што неўзабаве ў Беларусі зʼявіцца шмат так званай безгаспадарнай спадчыны. То бок нерухомасці, якую ніхто не прыняў у спадчыну пасля смерці ўласніка.
«І ўся гэтая безгаспадарная спадчына адыдзе дзяржаве», – кажа крыніца.
Суразмоўца лічыць, што змены вядуць да таго, каб «адціскаць кватэры ў тых, хто выехаў за мяжу».
Іншая крыніца Свабоды расказала пра затрыманне натарыуса ў адным з райцэнтраў.
«Яна «спалілася« на тым, што выпісвала даверанасці людзям без асабістай прысутнасці. Тым, хто быў за мяжой. Таму пачалі праверкі ўсіх натарыусаў», – зазначыла крыніца.
Як патлумачыў Свабодзе яшчэ адзін суразмоўца, зараз па генеральнай даверанасці, аформленай у Беларусі, пакуль можна прадаць нерухомасць ці атрымаць даведку на чалавека, які за мяжой.
«Але ёсць іншыя складанасці, і яны пакуль непераадольныя. Напрыклад, я рабіла для чалавека, які за мяжой, па даверанасці даведку аб несудзімасці. На яе трэба было паставіць апастыль. Але гразь змены ў адміністрацыйных працэдурах заплаціць за апастыль можа толькі той чалавек, які мне даваў даверанасць. Вось і ўсё», – патлумачыла крыніца.
Рыхтуецца забарона на продаж нерухомасці ў Беларусі без прысутнасці ўласніка
Яна дадала, што для натарыусаў нядаўна праводзілі адмысловую вучобу, каму і як прадаваць кватэры ў сучасных умовах.
«Бо, думаю, людзі знаходзілі нейкія «дзіркі«, каб усё-такі прадаць кватэру ў Беларусі. Цяпер жа сказалі строга – толькі асабістая прысутнасць, калі не – вылеціш з працы, як мінімум», – дадала крыніца.
На яе думку, рыхтуецца забарона на продаж нерухомасці ў Беларусі без прысутнасці ўласніка.
Нагадаем, пасля апублікаванага ў верасні 2023 году ўказу змяніліся правілы атрымання і прымянення даверанасцяў, пашпартоў і даведак. Раней грамадзяне Беларусі, якія жывуць за мяжой, маглі аформіць у беларускім консульстве даверанасць на распараджэнне сваёй маёмасцю на радзіме. Напрыклад, каб прадаць у Беларусі машыну, кватэру ці іншую маёмасць. Цяпер такой магчымасці больш няма, даверанасць трэба рабіць асабіста ў Беларусі. Апастыль на дакументы, паводле новага ўказу, таксама трэба рабіць у Беларусі.
вх