Урадавы аналітычны цэнтр Савет па лічбаванні перасцерагае перад пагрозай з боку кітайскіх пастаўшчыкоў тэхналогіі, паведамляе Puls Biznesu. Нагадваем, гэткія засцярогі ўтрымліваў выдадзены раней дакумент, у якім савет раіў выдаліць прыкладанне TikTok са службовых прыладаў. Аднак цяпер члены савета вырашылі прысвяціць згаданым пагрозам асобны дакумент.
У сваім заключэнні Савет па лічбаванні заклікае паскорыць працу над папраўкай у Закон аб нацыянальнай сістэме кібербяспекі і ўнесці змены ў праект палажэнняў адносна «пастаўшчыкоў высокай рызыкі» такім чынам, каб прадавец або вытворца прызнаны пастаўшчыком высокай рызыкі быў выключаны з далейшых закупак абсталявання і паслуг.
Паводле савета «адсутнасць заканадаўчых крытэрыяў па прызнанні статуса пастаўшчыка высокай рызыкі» небяспечная. На думку савета, ацэнка па гэтай справе павінна выдавацца кампетэнтным дзяржаўным органам і на аснове заканадаўчых крытэрыяў з пашанай канстытуцыйных прынцыпаў абароны прыватнай уласнасці, бяспекі дзяржавы і грамадзян, чытаем у выданні Puls Biznesu.
Нагадваем, усё больш краін забараняюць усталёўваць кітайскае прыкладанне TikTok на службовых прыладах. Такія абмежаванні ўжо ўвялі ЗША, Францыя і Нарвегія.
аз