Офіс Святланы Ціханоўскай разам з групай праваабаронцаў і гісторыкаў распрацавалі Канцэпцыю стварэння Інстытута нацыянальнай памяці для Беларусі.
Інстытут нацыянальнай памяці для Беларусі — гэта незалежны механізм, які будзе працаваць на аснове закона, міжнародных стандартаў і прынцыпу права на ісціну — як індывідуальнага, так і калектыўнага. Канцэпцыя грунтуецца на досведзе Польшчы, Германіі, Чэхіі, краінаў Балтыі, Іспаніі, Украіны і ПАР.
Інстытут нацыянальнай памяці ў гэтай мадэлі становіцца месцам, дзе аднаўляюцца імёны, адкрываюцца дакументы і ствараецца агульная прастора сумленнага разважання пра мінулае як аснову дэмакратычнай будучыні.
У рамках дзейнасці Інстытута нацыянальнай памяці прадугледжваецца:
– дакументаванне механізмаў рэпрэсіяў;
– аднаўленне імёнаў і годнасці пацярпелых, а таксама механізмы рэабілітацыі пацярпелых ад дзеянняў рэжыму Лукашэнкі;
– адкрыццё архіваў і доступ да дакументаў;
– інтэграцыя правераных ведаў у адукацыі і публічнай прасторы;
– праверка люстрацыйных дэкларацыяў дзяржаўных службоўцаў, суддзяў і супрацоўнікаў праваахоўных органаў.
«Інстытут нацыянальнай памяці арыентуецца на павагу да продкаў, нацыянальную памяць і свядомасць, бо толькі праз гэта можна ўмацаваць грамадства», пазначаецца на старонцы Офіса Святланы Ціханоўскай.
яс