Прэм’ер-міністр Славакіі Роберт Фіца пацвердзіў, што найбліжэйшымі днямі наведае Маскву і сустрэнецца з расійскім дыктатрам Уладзімірам Пуціным. Як і летась, славацкі палітык плануе ўзяць удзел у мерапрыемствах з нагоды 9 траўня, калі ў Расіі адзначаюць так званы Дзень Перамогі.
Пра гэта славацкі прэм'ер паведаміў падчас саміту Еўрапейскай палітычнай супольнасці ў Ерэване:
— У суботу я паеду ў Маскву. Ускладу кветкі да Магілы Невядомага салдата Чырвонай арміі, каб падзякаваць ад імя славачак і славакаў за вызваленне. У мяне таксама павінна быць кароткая сустрэча з прэзідэнтам Пуціным. Гэта ўсё. Я не збіраюся на ніякі вайсковы парад.
На палях саміту кіраўнік славацкага ўрада таксама сустрэўся з прэзідэнтам Украіны Уладзімірам Зяленскім. Фіца паведаміў, што да канца чэрвеня ў Браціславе або Кіеве павінны адбыцца славацка-ўкраінскія міжурадавыя кансультацыі.
Прэм'ер Фіца таксама выказаў надзею на актывізацыю супрацоўніцтва ў Вышаградскай групе пасля змены ўрада ў Венгрыі.
iar/эж