Сёння ў Варшаве Польшча, ЗША і Украіна заключаць пагадненне аб супрацоўніцтве па ўмацаванні рэгіянальнай бяспекі паставак газу.
Дакумент падпішуць прадстаўнік Канцылярыі прэм'ера міністр Пётр Наімскі (Piotr Naimski), міністр па справах энергетыкі ЗША Рык Перы і сакратар Савета бяспекі і нацыянальнай абароны Украіны Аляксандр Данілюк.
У Варшаве адбудзецца таксама другая сустрэча ў рамках стратэгічнага энергетычнага дыялогу паміж Польшчай і ЗША.
Нагадаем, цягам апошніх гадоў Польшча падпісала некалькі кантрактаў на пастаўкi газу з ЗША, у тым ліку, доўгатэрміновы кантракт з Cheniere Marketing.
Старшыня Польскай нафтагазавай кампаніі (PGNiG) Пётр Возняк (Piotr Woźniak), пераконвае, што супрацоўніцтва з амерыканскімі партнёрамі ідзе без праблем.
- Амерыканскія, або іншыя партнёры прапануюць нам значна лепшыя ўмовы кантрактаў, чым тыя, якія прадугледжвае дзейны кантракт з расійскім пастаўшчыком. Нагадаю, гэты кантракт заканчваецца ў 2022 годзе.
Як падкрэсліваюць прадстаўнікі польскіх уладаў, дзяржава рэалізуе стратэгію ліквідацыі расiйскай манаполіі на пастаўкі прыроднага газу ў Польшчу.
аз