16 сакавіка ў Варшаве адбыўся канцэрт Бі-2, на які прыйшлі тысячы беларусаў. Песню «Мой рок-н-рол» гітарыст Шура (Аляксандр Уман) выканаў разам з Ксеніяй Жук з NaviBand.
Са сцэны Шура расказаў, што напісаў гэтую песню ў сваім родным Бабруйску ў 1988 годзе і папрасіў беларусаў у зале падняць рукі. Не менш за палову гледачоў адрэагавалі. «Жыве Беларусь!» – пракрычаў у мікрафон музыка Бі-2 і перадаў прывітанне землякам. Гледачы скандавалі «Жыве Беларусь!» у адказ.
«Бі-2» – рок-група, утвораная ў 1988 годзе ў Бабруйску. Заснавальнікі і нязменныя ўдзельнікі – Шура Бі-2 (гітара, вакал) і Лёва Бі-2 (асноўны вакал). У 2023 годзе ўдзельнікі групы эмігравалі ў Ізраіль. 25 студзеня 2024 года групу Бі-2 у поўным складзе затрымала паліцыя Тайланда. Расійскі консул настойліва патрабаваў выдаць ўдзельнікаў калектыву Расіі. Дзякуючы ўмяшанню міжнародных сілаў атрымалася не дапусціць іх выдачы.
Хартыя'97
нг