Сёння, 4 верасня, спаўняецца 90 гадоў з дня нараджэння Сакрата Яновіча — аднаго з найбольш значных беларускіх пісьменнікаў Беласточчыны.
Сакрат Яновіч нарадзіўся ў 1936 годзе ў Крынках. Пісьменнік, публіцыст і перакладчык, ён пакінуў пасля сябе больш за дваццаць кніг, прысвечаных перад усім жыццю беларускай меншасці Беласточчыны, яе мове, памяці і пошукам уласнай ідэнтычнасці.
Шмат гадоў Яновіч быў звязаны з тыднёвікам беларусаў у Польшчы «Ніва» і Беларускім літаратурным аб’яднаннем «Белавежа», рыхтаваў перадачы для Беларускай службы Польскага радыё, займаўся таксама грамадскай і палітычнай дзейнасцю. Яго родны дом у Крынках, вядомы як Villa Sokrates, стаў важным месцам сустрэч беларускай інтэлігенцыі — пісьменнікаў, мастакоў і навукоўцаў.
Сакрат Яновіч памёр у 2013 годзе. Пахаваны ў родных Крынках.
Сёння ў Беластоку адбудзецца вечар памяці, прысвечаны 90-годдзю пісьменніка. У праграме — фрагменты дакументальных фільмаў і дыскусія пра культуру, літаратуру і беларуска-польскае памежжа ў духу «Беларускага трыялога». У дыскусіі возьмуць удзел Лявон Баршчэўскі, Малгажата Дмітрук, Лёнік Тарасевіч і Мікола Ваўранюк. Музычную атмасферу створыць музыкант SK.EIN.
Сустрэча пачнецца а 18-й гадзіне паводле польскага часу ў клубе Zmiana Klimatu на вуліцы Warszawska, 6 у Беластоку. Уваход вольны.
Зміцер Косцін/нг