1-2 чэрвеня 2023 г. у Варшаве праходзіць міжнародная навуковая канферэнцыя “Мова, літаратура і культура Беларусі ў Польшчы і свеце”, арганізаваная кафедрай беларусістыкі факультэта прыкладной лінгвістыкі Варшаўскага ўніверсітэта. Адзін з удзельнікаў навуковага форуму — вядомы польскі беларусіст, cупрацоўнік Славянскага інстытута Чэшскай АН Мірослаў Янковяк.
Мірослаў Янковяк з’яўляўся вядучым секцыі мовазнаўства на канферэнцыі ў ВУ, на якой таксама выступіў з дакладам пра вызначэнне меж беларускіх гаворак у даследаваннях лінгвістаў.
У кулуарах канферэнцыі даследчык падзяліўся сваімі развагамі, з якімі цяжкасцямі сёння сутыкаюцца беларусазнаўцы ў сувязі з тымі падзеямі, якія адбываюцца ў Беларусі з 2020 года і ў сувязі з вайной Расіі супраць Украіны, у якой улады Беларусі стаяць на баку Расіі — краіны-агрэсара.
Мірослаў Янковяк: — Беларусь закрыта для беларусазнаўцаў з іншых краін. Фактычна цяпер у беларускіх вучоных ёсць магчымасць супрацоўнічаць толькі з Расіяй.
Мірослаў Янковяк лічыць, што беларусістыка ў Беларусі знаходзіцца пад пагрозай і ў сувязі з гэтым трэба яе больш актыўна развіваць па-за Беларуссю.
Мірослаў Янковяк: — Рэпрэсіі і эміграцыя многіх даследчыкаў з Беларусі сведчаць пра тое, што Рэспубліка Беларусь не можа нават на базавым узроўні забяспечыць беларусазнаўчыя даследаванні.
Мірослаў Янковяк адзначае, што існуе вялікае поле для беларусазнаўчых даследаванняў перш за ўсё ў краінах, якія мяжуюць з Беларуссю. А прэцэдэнты актывізацыі беларусазнаўства ў гэтых дзяржавах ужо ёсць.
Мірослаў Янковяк мае амбітны план: аб’ехаць Беларусь па перыметры яе граніц і даследаваць стан беларускіх гаворак на памежжы з іншымі краінамі. Гэту работу вучоны ўжо выканаў на латвійска-беларускім памежжы, а таксама завяршае на літоўска-беларускім паграніччы. Аднак многія планы перакрэсліла вайна.
Віктар Корбут
Слухайце аўдыё