Ёсць дамоўленасць. Пад эгідай Польшчы і ЗША будзе створаны Навучальны цэнтр чыстых энергетычных тэхналогій. Амерыканцы будуць перадаваць веды аб ядзернай энергетыцы пры будаўніцтве атамнага аб’екту ў паўночнай Польшчы і спаборнічаюць за чарговае месца, піша BiznesAlert.pl.
Цэнтр будзе аб'ядноўваць навукоўцаў і прадпрымальнікаў з усёй Польшчы, каб стварыць у супрацоўніцтве з ЗША патэнцыял для рэалізацыі праекта атамнай электрастанцыі ў Польшчы па тэхналогіі AP1000.
– Для эфектыўнай і бяспечнай рэалізацыі нашай праграмы нам спатрэбяцца тысячы інжынераў, – прызнаўся падчас інаўгурацыі Мілаш Матыка, намеснік міністра клімату і навакольнага асяроддзя Рэспублікі Польшча. Польскія фірмы атрымаюць падтрымку ад цэнтру для ўваходжання ў ланцугі паставак атамнай энергетыкі па ўсім свеце. Праца цэнтра накіравана на падрыхтоўку ядзернага персаналу.
– Новы ўрад цалкам адданы энергетычнай трансфармацыі і ядзернай энергетыцы, якая з’яўляецца важным элементам гэтага працэсу, – заявіў Матыка. Ён падкрэсліў важнасць сумеснага нарошчвання патэнцыялу ядзернай энергетыкі Польшчай і ЗША.
– Гэта працяг супрацоўніцтва паміж Польшчай і ЗША. Думаючы пра Польшчу ў бліжэйшыя 30 гадоў і выклікі, з якімі яна сутыкнецца, якія будуць іншымі, чым за апошнія 30 гадоў, нарошчванне ведаў і ўстойлівасці праз гэты цэнтр будзе мець ключавое значэнне, - сказаў амбасадар ЗША ў Польшчы Марк Бжэзіньскі. Ён ацаніў, што будаўніцтва цэнтра, якое фінансуе Міністэрства энергетыкі ЗША, з'яўляецца «інвестыцыяй у Польшчу», якая ажыццяўляецца ў рамках міжурадавага пагаднення аб развіцці грамадзянскай атамнай энергетыкі. Цэнтр у Варшаве — першая ў свеце ўстанова такога тыпу, заснаваная амерыканцамі.
ав/BiznesAlert.pl