Вялізны штраф заплаціць кампанія з Сілезіі за продаж «беларускім шляхам» люксавых аўтамабіляў у Расію

Агульны кошт транспартных сродкаў, прададзеных такім чынам, перавысіў 19 мільёнаў еўра.

Ілюстрацыйны здымак.

Toby_Parsons/pixabay.com/CC0

Нацыянальная падатковая адміністрацыя (KAS) наклала штраф у памеры 20 мільёнаў злотых (больш за 4,7 мільёна еўра) на кампанію з Сілезскага ваяводства, якая прадавала аўтамабілі класа «люкс» у Расію, парушаючы санкцыі ЕС.

— Функцыянеры Сілезскага мытна-падатковага ўпраўлення ў Катавіцах праверылі кампанію, якая працуе ў Сілезскім ваяводстве. Яны выявілі, што ў перыяд з 1 студзеня па 23 чэрвеня 2023 года кампанія прадала 177 аўтамабіляў і адзін матацыкл за межамі Еўрапейскага Саюза, — чытаем у прэс-рэлізе Палаты падатковай адміністрацыі ў Катавіцах.

Паводле вынікаў праверкі, транспартныя сродкі былі перавезены праз Беларусь у Расію, дзе яны і былі зарэгістраваныя. Агульны кошт, прададзеных такім чынам падсанкцыйных тавараў перавысіў 19 мільёнаў еўра.

— Пасля правядзення адміністрацыйнага разбору кіраўнік Сілезскага мытна-падатковага ўпраўлення ў Катавіцах наклаў на кампанію штраф у памеры 20 мільёнаў злотых. Упраўленне прымяніла максімальны памер штрафу з-за маштабу аперацыі і ўсведамлення прадпрымальнікам таго, што тавары ў канчатковым выніку трапяць да расійскага кліента, — дадалі чыноўнікі.

Нагадаем, аштрафаваны прадпрымальнік парушыў забарону ЕС ад 31 ліпеня 2014 года, якая датычыцца абмежавальных мер у сувязі з дзеяннямі Расіі, якія дэстабілізуюць сітуацыю ва Украіне. Гэты рэгламент забараняе продаж, пастаўку, перадачу або экспарт прадметаў раскошы, якія не могуць быць пастаўлены фізічным або юрыдычным асобам у Расіі.

PAP/аз