– Калі расійская нафта не пойдзе на еўрапейскі рынак, эталоннай цаны не будзе. Такія цэны будуць фармавацца там, дзе рэальна паступіць абʼём, – заявіў гендырэктар «Раснафты» Ігар Сечын.
«На першым этапе, відаць, прыйдзецца адмовіцца ад фʼючарснага гандлю, каб скарэктаваць гэтыя рынкавыя паказчыкі», – сказаў Ігар Сечын.
Расіяне гандлююць нафтай на фʼючарсах і на спотавым рынку. Адмова ад гандлю апошнімі прывядзе да скарачэння паставак, абмежаваных заходнімі санкцыямі ў выглядзе максімальнай цаны, поўнага эмбарга ў ЗША, Канадзе і Вялікабрытаніі і марскога эмбарга ў Еўрасаюзе. Нагадаем, аналагічны крок зрабіў «Газпром», які ў рамках распальвання энергетычнага крызісу адмовіўся ад біржавых здзелак восенню 2021 года. Гэты крок у спалучэнні з наступнымі абмежаваннямі на пастаўкі кліентам, такімі як спыненне Ямальскага кантракту з Польшчай, дазволіў падняць цэны на газ перад уварваннем Расіі ва Украіну. Сам Сечын шукае аналогіі з газавым рынкам. Ён кажа аб падрыве «прынцыпаў рынку» шляхам парушэння ланцужкоў паставак.
На яго думку, рэарганізацыя газавага рынку ў Еўропе «супярэчыць здароваму сэнсу», таму што Еўропа вымушана адмовіцца ад доўгатэрміновых кантрактаў на карысць спотаў, страціўшы сваю найвялікшую перавагу, гэта значыць «энергетычную бяспеку праз доступ да танных і надзейныя энергарэсурсы з Расіі і цяпер плаціць за газ у тры-пяць разоў больш. Сечын не згадаў, што менавіта расіяне спынілі пастаўкі газу большасці еўрапейскіх спажыўцоў, скараціўшы сваю долю на рынку з прыкладна 40 працэнтаў у 2021 годзе да 5 працэнтаў у 2022 годзе. Расіяне разарвалі шэраг доўгатэрміновых кантрактаў, падарваўшы давер да сябе і прымусіўшы такіх заказчыкаў, як нямецкая Uniper або польская PGNiG, звярнуцца ў суд. Еўрапейцы хочуць адмовіцца ад газу з Расіі не пазней за 2027 год у рамках праграмы ЕС REPowerEU.
Між тым, біржавы кошт нафты маркі Brent складае каля 80 долараў, а маркі Urals – каля 50 долараў. Каб, нягледзячы на санкцыі, прадаваць сыравіну за межы Еўропы, расіяне вымушаныя рабіць дадатковыя зніжкі.
Продаж вуглевадародаў склаў каля паловы даходаў бюджэту Расіі ў 2022 годзе.
Biznesalert.pl / вх