Новы рынак працы ў ІТ фарміруецца на нашых вачах – чытаем на сайце Business Insider. Напісанне кода на клавіятуры чалавекам перастае быць самастойнай прафесіяй — гэта становіцца толькі адным з уменняў. На першы план выходзіць супастаўленне сістэм і агентаў штучнага інтэлекту, праца з данымі, а таксама адказнасць за якасць, бяспеку і адпаведнасць рашэнняў патрабаванням законаў. Фактычна гаворка ідзе пра з’яўленне новай спецыяльнасці — аператара ШІ.
Кампаніі паскараюць інвестыцыі ў інфраструктуру і праекты ў сферы штучнага інтэлекту, і разам з гэтым расце попыт на спецыялістаў, здольных ператвараць мадэлі і агентаў у стабільныя і вымяральныя прадукты.
На глабальным узроўні выдаткі на ШІ — ад дата-цэнтраў да праграмнага забеспячэння — дэманструюць імклівы рост. Гэта стварае дадатковы попыт на прафесійныя ролі, звязаныя як з бізнес-каштоўнасцю, так і з эфектыўным выкарыстаннем вылічальных рэсурсаў.
У сваю чаргу выданне Noizz прыводзіць прыклады людзей, якія не могуць знайсці працу ў новай рэальнасці.
— Я адчуваю сябе, нібы ў тупіку. Мне 35 гадоў, і ўпершыню за 17 гадоў я не магу знайсці працу, — кажа Ася. Яна працавала ў буйных кампаніях, мела добрую пазіцыю. Але год таму яе месца заняў… штучны інтэлект.
Падобныя гісторыі чуваць усё часцей. Асабліва ад маладых.
— Калісьці я пачынаў з простых заданняў, цяпер іх ужо няма. Машына робіць гэта хутчэй, танней і без памылак, — прызнаецца праграміст Адам. Ён бачыць, як ШІ мяняе IT-галіну.
Сёння тэхналогіі замяняюць людзей у кол-цэнтрах, офісах, нават у крамах. Усё часцей замест касіра мы сустракаем аўтамат, а замест кансультанта — чат-бот.
Асабліва цяжка тым, хто толькі пачынае кар’еру. Раней існавалі стажыроўкі, пасады для пачаткоўцаў. Сёння такіх месцаў амаль няма. Кампаніі прызнаюцца: працы, якія раней займалі ў маладых спецыялістаў некалькі дзён, цяпер робяцца за некалькі хвілін штучным інтэлектам.
Аднак эксперты нагадваюць: ШI не забярэ працу ва ўсіх. Ён стане інструментам. Перад тымі, хто навучыцца з ім працаваць, адкрыюцца новыя магчымасці. Патрэбныя будуць не толькі праграмісты, але і людзі, якія здолеюць творча і разумна выкарыстоўваць тэхналогіі.
нг