Дзеючыя правілы ў Польшчы прадугледжваюць, што падчас бальнічнага супрацоўніку нельга займацца дзейнасцю, якая яму дае заробак або дзейнасцю, несумяшчальнай з мэтай бальнічнага. На жаль, польскія законы не вызначаюць, што лічыцца «аплачваемай працоўнай дзейнасцю» або дзейнасцю, «несумяшчальнай з мэтай водпуску».
Дзейсныя законы таксама не ўлічваюць ніякіх выключэнняў, таму Установа сацыяльнага страхавання (ZUS) часта ставіла пад сумнеў заявы на бальнічны і адмаўляла ў выплаце па хваробе. Аднак, чакаецца,што гэта хутка зменіцца, кажа Себасцьян Гаеўскі, намеснік міністра сям'і, працы і сацыяльнай палітыкі.
— З дапамогай гэтых змен мы хочам рацыяналізаваць правілы бальнічнага і ўнесці ў іх здаровы сэнс. Падчас бальнічнага нельга рабіць рамонт у кватэры або ехаць у адпачынак, і гэта зразумела. Але таксама відавочна, што ніхто не павінен губляць права на аплату бальнічнага за ўвесь перыяд хваробы толькі таму, што ён пайшоў на шпацыр, схадзіў у прадуктовую краму па неабходныя рэчы ці, напрыклад, занёс мужу абед на працу — такія выпадкі мы ведаем.
Міністэрства таксама лічыць, што ніхто не павінен губляць права на аплату бальнічнага за выкананне так званай выпадковай дзейнасці, звязанай з працаўладкаваннем. У цяперашні час Установа сацыяльнага страхавання (ZUS) можа аспрэчыць бальнічны, нават калі хворы адкажа хаця б на адзін працоўны званок, або адправіць электронны ліст. Аднак ёсць выпадкі, калі гэта неабходна, напрыклад, трэба тэрмінова падпісаць важны рахунак-фактуру. Новыя правілы таксама ўводзяць яшчэ адно важнае выключэнне з агульнага правіла, якое забараняе працу падчас бальнічнага. Гэта датычыцца людзей, якія занятыя ў некалькіх арганізацыях.
У цяперашні час мяркуецца, што калі супрацоўнік атрымлівае бальнічны, ён не можа працаваць нідзе, кажа Лукаш Казлоўскі з Федэрацыі польскіх прадпрымальнікаў.
— Для людзей, якія працуюць адначасова ў некалькіх арганізацыях, магчымая сітуацыя, калі лекар будзе індывідуальна ацэньваць, ці з'яўляецца дадзеная хвароба прычынай непрацаздольнасці на ўсіх працоўных месцах, ці толькі для працы, якая выконваецца на адной пасадзе, але не будзе перашкаджаць працаваць на іншай.
У якасці, прыкладу прыводзіцца хірург, які працуе ў бальніцы і адначасова выкладае ва ўніверсітэце, зламаў палец. У такім выпадку, у яго не атрымаецца аперыраваць пацыентаў, але ён можа чытаць лекцыі студэнтам. І менавіта на гэтыя і падобныя сітуацыі распаўсюджваецца абмеркаванае тут новаўвядзенне.
Змены ўжо прыняў Сейм. Цяпер законапраект павінен быць ухвалены Сенатам і падпісаны прэзідэнтам Польшчы.
PR1/яс