Аляксандр Лукашэнка дабіў свабодныя СМІ, запоўніў турмы сваімі праціўнікамі і паехаў да Уладзіміра Пуціна, каб паразмаўляць пра больш глыбокую інтэграцыю – піша «Rzeczpospolita» ў артыкуле «Прыгавораны да Расіі».
Лукашэнка здзівіў сваёй прысутнасцю ў Санкт-Пецярбургу нават журналістаў расійскіх дзяржаўных СМІ. Ён прыехаў туды ў аўторак раніцай з раней неанансаваным візітам, каб чарговы раз сустрэцца з Пуціным. З афіцыйных паведамленняў нельга зрабіць высновы, навошта на самой справе Лукашэнка прыляцеў у Расію. Ён паскардзіўся на Захад, які нібыта прымяняе тэрор у дачыненні да яго прыхільнікаў і супрацоўнікаў. Ён нават намякнуў, што без падтрымкі Расіі не змог бы ўтрымаць уладу.
У сваю чаргу Уладзімір Пуцін пераконваў, што ў абліччы ўведзеных Захадам санкцый беларуская эканоміка добра спраўляецца і рэалізоўвае абавязацельствы ў дачыненні да Масквы. Пуцін дадаў, што ключавой тэмай двухбаковых стасункаў з’яўляецца будова Саюзнай дзяржавы, як заўсёды не здраджваючы падрабязнасцяў.
Добра паінфармаваная крыніца газеты «Rzeczpospolita» ў Маскве цвердзіць, што дарожная мапа па інтэграцыі ўзгодненая на міжурадавым узроўні, але размовы захраслі на найважнейшых тэмах, якія вырашыць могуць толькі Пуцін і Лукашэнка падчас асабістай размовы. Інфарматар, нават пры поўнай ананімнасці, не хоча здрадзіць, чаго могуць тычыцца гэтыя самыя важныя пытанні.
Гэта ўжо чацвёртая асабістая сустрэча лідараў у гэтым годзе, пры гэтым яны амаль штотыдзень размаўляюць па тэлефоне – канстатуе «Rzeczpospolita».
ав