Ужо на выходных з'явіліся першыя звесткі аб тым, што расіяне збіраюць вялікую колькасць ракетных установак на аэрадроме Зябраўка пад Гомлем - піша Fakt. Спадарожнікавыя здымкі не пакідалі сумневаў, што яны да нечага рыхтуюцца. Да чаго, стала зразумела раніцай у сераду, калі з тэрыторыі Беларусі былі запушчаны ракеты Х-59 з расійскіх самалётаў Су-34. Ракеты трапілі ў аэрадром пад Жытомірам ва Украіне. Гэта, на думку польскага генерала Станіслава Козея (Stanisław Koziej), можа быць добра падрыхтаванай правакацыяй.
– Магчыма, Расія наўмысна робіць такія ўдары з тэрыторыі Беларусі, каб справакаваць Украіну на контрудар па тэрыторыі Беларусі і такім чынам уцягнуць краіну ў вайну. Гэтым Лукашэнка можа тлумачыць уступленне ў вайну, – кажа былы кіраўнік Бюро нацыянальнай бяспекі. Ён адзначае, што гэтая акцыя яскрава сведчыць аб тым, што беларускія ўлады нічога не вырашаюць у Беларусі, ім прыходзіцца выконваць загады Крамля. Правакаванне ўкраінцаў на знішчэнне тэхнікі і самалётаў, сабраных у беларускім аэрапорце, дазволіла б Лукашэнку сказаць уласнаму грамадству, што на Беларусь напалі і трэба наступаць.
Украінская супрацьпаветраная абарона збівае ўсё больш ракет, запушчаных з расійскай тэрыторыі. Тым часам расіяне імкнуцца знішчыць шляхі пастаўкі заходняй тэхнікі, а з Беларусі значна прасцей весці абстрэл заходняй часткі Украіны.
- І гэта сігнал, дадзены нам, гэта значыць НАТА, што гульня рызыкоўная, што падтрымка Украіны рызыкоўная, таму што гэтыя абстрэлы могуць адбывацца каля нашай мяжы, – кажа генерал Козей.
Вопытны вайсковец, аднак, раіць не паддавацца на прэсінг і шантаж. Ён лічыць, што, калі ў бок Польшчы з Беларусі паляцяць ракеты, Паўночнаатлантычны альянс павінен прыняць рашучыя дзеянні, ствараючы зону супрацьракетнай абароны ўздоўж мяжы з Украінай.
нг