Адна віза для расійскага студэнта, 14 турыстычных, 813 працоўных і 659 гуманітарных – так, паводле выдання «Rzeczpospolita», зараз выглядае візавая палітыка Польшчы ў дачыненні да грамадзян Расійскай Федэрацыі. Міністэрства замежных справаў змяніла візавую палітыку ў дачыненні да расіян. Разглядаюцца толькі заявы, якія вынікаюць з гуманітарных меркаванняў і супадаюць з інтарэсам Польшчы, паведамляе газета.
Паводле дадзеных польскага МЗС, з 24 лютага па 9 жніўня расіянам выдалі 4 513 віз. З канца сакавіка, калі Міністэрства ўнутраных спраў і адміністрацыі выдала пастанову, якая забараняе ўезд расіянам выключна ў турыстычных мэтах, Польшча ўвогуле не выдае такіх віз. Для параўнання, за ўвесь мінулы год грамадзяне РФ атрымалі 31 тысячу 297 віз – у тым ліку ажно 17 тысяч 388 працоўных, амаль тысячу – студэнцкіх і 95 турыстычных.
МЗС паясняе, што абмежаванні звязаныя з некалькімі прычынамі. Гэта не толькі новыя прававыя абмежаванні, але таксама «значнае скарачэнне колькасці дыпламатычнага, консульскага і дапаможнага персаналу ў польскіх консульскіх установах у Расійскай Федэрацыі».
На пачатку красавіка Расія выслала са сваёй краіны 45 польскіх дыпламатаў і консульскіх супрацоўнікаў. Гэта быў адказ на высылку такой жа колькасці расійскіх дыпламатаў з дыпламатычных місій у Польшчы, якіх Агенцтва ўнутранай бяспекі палічыла шпіёнамі.
У выніку гэтых падзеяў, як паясняюць у МЗС, польскія прадстаўніцтвы ў Расіі абмежавалі сваю дзейнасць у сферы прыёму і выдачы візаў за кошт іншых консульскіх функцыяў, важных з пункту гледжання польскай замежнай палітыкі.
«Цяпер прымаюцца толькі заявы грамадзян Расійскай Федэрацыі, пададзеныя з гуманітарных меркаванняў, у тэрміновых, асабліва абгрунтаваных сітуацыях і, калі гэтага патрабуюць інтарэсы Рэспублікі Польшча», – падкрэслівае міністэрства ў выданні «Rzeczpospolita».
аз