«Справы, пра якія напісаў прэм'ер-міністр Дональд Туск, тычацца правядзення разведкі ваенных аб'ектаў і элементаў крытычна важнай інфраструктуры, падрыхтоўкі сродкаў для ажыццяўлення актаў дыверсіі», — дадаў міністр і каардынатар спецслужбаў Томаш Семоняк.
«Гэта была падрыхтоўка да розных відаў дыверсій або збор інфармацыі аб нашай крытычна важнай інфраструктуры», — сказаў радыё ZET міністр унутраных спраў і адміністрацыі Марцін Кервінскі.
На пытанне, ці стаяць за гэтым расейцы, Кервінскі адказаў: «У большасці з іх».
«Мы ведаем пра гэта пасля правядзення допытаў і расследаванняў. Відавочна, што Расія ўступіла ў фазу халоднай вайны ў адносінах да ўсяго Еўрапейскага Саюза», — дадаў ён.
Агенцтва ўнутранай бяспекі (ABW) абвясціла, што ў чацвер, 16 кастрычніка, быў затрыманы грамадзянін Украіны Даніла Г.
«Мужчына праводзіў разведвальную дзейнасць у Польшчы і Румыніі. Арышт стаў вынікам сумесных аперацый, праведзеных Агенцтвам унутранай бяспекі з румынскімі спецслужбамі. Адначасова ў Румыніі былі затрыманыя яшчэ два грамадзяне Украіны, якія цесна супрацоўнічалі з падазраваным Данілам Г.», — гаворыцца ў паведамленні.
Затрыманаму было прад'яўлена абвінавачанне ў дзеяннях ад імя расійскай разведкі супраць Польшчы шляхам падрыхтоўкі да здзяйснення дыверсій, звязаных з адпраўкай ва Украіну пасылак, якія змяшчаюць выбуховыя рэчывы і небяспечныя матэрыялы. Суд пакінуў яго пад вартай на тры месяцы.
«За апошнія месяцы супрацоўнікі ABW затрымалі 55 асоб, якія дзейнічалі на шкоду Польшчы па загаду расійскай разведкі», — сказаў Яцэк Дабжынскі, прэс-сакратар міністра і каардынатара спецслужбаў.
«Затрыманы — 21-гадовы ўкраінец, які жыў пад Варшавай і працаваў складскім рабочым. Разам з двума ўкраінскімі калегамі, ён стварыў маршрут для адпраўкі выбухоўкі праз Польшчу і Румынію ва Украіну. 21-гадовага мужчыну затрымалі пад Варшавай, а двух яго калег — румынскія спецслужбы ў Бухарэсце», — удакладніў Дабжынскі.
З 2022 года было зафіксавана 110 выпадкаў нападаў і спроб нападаў у еўрапейскіх краінах, за якімі стаяла Расія. Часцей за ўсё дыверсійныя акты адбываліся ў Польшчы і Францыі.
Паводле інфармацыі спецслужбаў, вярбоўка адбываецца на закрытых форумах у даркнэце або праз мессенджер Telegram.
яс