Кітай увайшоў у новую фазу геапалітычнай самаўпэўненасці і ўсё менш зацікаўлены ў кампрамісах з Еўропай. Пра гэта ў размове з Gazeta.pl заявіў намеснік кіраўніка Асяродка ўсходніх даследаванняў (OSW) доктар Якуб Якубоўскі. На яго думку, тры дзесяцігоддзі развіцця ЕС у «цяплічных умовах» скончыліся, а Пекін усё часцей навязвае ўласныя правілы гульні.
Эксперт адзначае, што Кітай пачаў успрымаць сябе роўным ЗША і дэманструе гэта, у тым ліку, праз санкцыйныя войны і абмежаванні на экспарт рэдказямельных металаў. З Вашынгтонам Пекін яшчэ гатовы дамаўляцца, разглядаючы сітуацыю як «геапалітычную нічыю», аднак у адносінах да Еўрасаюза паводзіць сябе ўсё больш жорстка і пагардліва.
Паводле Якубоўскага, Кітай «паядае Еўропу жыўцом» у шэрагу ключавых галін — ад сталі і аўтамабільнай прамысловасці да фотаэлектрыкі, ветраэнергетыкі і хіміі. Вытворчыя выдаткі ў КНР значна ніжэйшыя, а кошты электраэнергіі — непараўнальна меншыя, чым у ЕС. Еўропа ж, лічыць эксперт, прайграе з-за адсутнасці паслядоўнай прамысловай палітыкі і ператварэння зялёнага пераходу ў амаль ідэалагічную мэту.
Аналітык папярэджвае, што свеце ўзрастае рызыка буйных канфліктаў, а магчымы крызіс вакол Тайваня стаў бы выпрабаваннем надзейнасці амерыканскіх саюзаў. У гэтых умовах Еўропе, у тым ліку Польшчы, неабходна сканцэнтравацца на ўзбраенні, умацаванні абароннага патэнцыялу і аднаўленні ўласнай прамысловай базы ў стратэгічных сектарах.
эж