Мінулай ноччу Расія правяла масіраваны ракетны ўдар па заходняй Украіне. Ужо другі раз была выкарыстана найноўшая расійская балістычная ракета «Арэшнік». Мэтай стала найбуйнейшае ў краіне падземнае газасховішча, якое выкарыстоўваецца сотнямі замежных кампаній – нагадвае Forsal.
«Арэшнік» — зброя, якую ўстаноўкі «Патрыёт» не ў стане спыніць. Сучасная гіпергукавая балістычная ракета здольная несці да шасці баявых галовак — як звычайных, так і ядзерных. Нягледзячы на тое, што ў Расіі ракет адносна мала, пачалася ўжо больш масавая вытворчасць, і, паводле заходніх аналізаў, у Еўропе ў цяперашні час няма сістэмы супрацьракетнай абароны, якая магла б эфектыўна іх перахапіць. Асаблівую трывогу выклікае тое, што «Арэшнік» таксама размешчаны ў Беларусі, а гэта значыць, што практычна кожная еўрапейская сталіца знаходзіцца ў межах дасяжнасці зброі.
Львоў быў не адзінай мэтай начнога нападу. У Кіеве былі пашкоджаны тры буйныя цеплавыя электрастанцыі, што пацвердзіў мэр горада Віталь Клічко. У некаторых раёнах сталіцы адбылося адключэнне электрычнасці, а рух на адной лініі метро быў прыпынены. Паведамленні пра адключэнні электрычнасці паступаюць і з Крывога Рога.
Атака на заходнюю Украіну з выкарыстаннем ракеты «Арэшнік» не выпадковая. Гэта дэманстрацыя сілы і магчымасцей расійскага ваенна-прамысловага комплексу. Гіпергукавая ракета з далёкасцю палёту да 5000 км, здольная несці некалькі баявых галовак, у тым ліку ядзерных, і ўстойлівая да сучасных абаронных тэхналогій, уяўляе сабой зусім новы від пагрозы. Яе разгортванне ў Беларусі адкрывае новую главу ў гонцы ўзбраенняў у Еўропе. Акрамя таго, удар па газасховішчы, якое выкарыстоўваюць замежныя кампаніі, — гэта ўдар не толькі па Украіне, але і па еўрапейскіх інтарэсах, – падсумоўвае выданне.
нг