Апытанне, на якое спасылаецца Reuters, паказвае, што 32% рэспандэнтаў маюць станоўчае меркаванне пра прэзідэнта ЗША. Выбаршчыкі-рэспубліканцы таксама ўсё больш скептычна ставяцца да яго дзеянняў і расчараваныя коштам жыцця.
Чатырохдзённае апытанне Ipsos (адна з вядучых сусветных кампаній па маркетынгавых даследаваннях) завяршылася ў нядзелю і паказала, што 73% рэспубліканцаў станоўча ацэньваюць дзейнасць Трампа супраць 82% у апытанні, праведзеным тыднем раней. У той час агульны рэйтынг падтрымкі Трампа складаў 35%.
Вайна з Іранам ударыла па рэйтынгах прэзідэнта ЗША
Пасля вяртання ў Белы дом у 2025 годзе крыху менш за палову амерыканцаў станоўча ўспрынялі прэзідэнцтва Трампа. У выбарчай кампаніі Трамп абяцаў стрымаць інфляцыю і пазбегнуць зацяжных войнаў. Яго папулярнасць пачала зніжацца пасля таго, як у лютым гэтага года ён загадаў нанесці сумесныя з Ізраілем удары па Іране. Канфлікт парушыў каля адной пятай сусветнага гандлю нафтай і газам, што прывяло да рэзкага росту цэн на паліва, што не засталося абыякавым для штодзённага жыцця.
Толькі 17% рэспандэнтаў станоўча ацанілі дзеянні Трампа па вырашэнні праблемы кошту жыцця. Амерыканцы кажуць, што гэтае пытанне паўплывае на іх рашэнні на выбарах у Кангрэс 3 лістапада, дзе рэспубліканцы будуць змагацца за захаванне сваёй нязначнай большасці ў парламенце.
Нават рэспубліканцы расчараваліся ў Трампе
Упершыню колькасць рэспубліканцаў, незадаволеных дзеяннямі Трампа па вырашэнні праблемы кошту жыцця, перавысіла колькасць тых, хто падтрымлівае яго ў гэтым пытанні (51% супраць 44%).
Апытанне праводзілася праз інтэрнэт. У ім прыняло ўдзел 1277 дарослых амерыканцаў. Памылка складае 3 працэнтныя пункты.
яс